ఒక చిన్న తప్పు ఆ పాటను సూపర్ హిట్ చేసింది.. ఇప్పటికీ ఆ సాంగ్ క్రేజ్ తగ్గలేదు…
అక్కినేని నాగేశ్వరరావు నటించిన దేవదాసు చిత్రంలోని కుడి ఎడమైతే పాట తెలుగు సినీ చరిత్రలో ఒక విశేషమైన స్థానాన్ని సంపాదించుకుంది. ఈ పాట విజయం వెనుక ఉన్న ఆసక్తికరమైన కథను ప్రముఖ రచయిత, దర్శకుడు కనగాల జయకుమార్ ప్రత్యేక ఇంటర్వ్యూలో వెల్లడించారు.
సినీ ప్రముఖుల చమక్కులు పుస్తక రచయితగా, కనగాల జయకుమార్ సినీ చరిత్రలోని అనేక అపురూప ఘట్టాలను పంచుకున్నారు. కుడి ఎడమైతే పొరపాటు లేదే, ఓడిపోలేదే అనే ఈ పాటను సీనియర్ సముద్రాల నిజానికి కూడి ఎడమైతే పొరపాటు లేదోయ్ అని రాశారు. ఇద్దరు ప్రేమికులు (హీరో, హీరోయిన్) కలిసి విడిపోయినా అది ఓటమి కాదనే ఉద్దేశంతో ఆయన ఈ పదాన్ని ఉపయోగించారు. అయితే, పాటను రీరైట్ చేస్తున్న అసిస్టెంట్ డైరెక్టర్ కూ అనే అక్షరానికి ఉండాల్సిన కొమ్మును పొరపాటున వదిలివేశారు.
ఆ విధంగా స్క్రిప్ట్ కుడి ఎడమైతేగా ఘంటసాలకి చేరింది. ఘంటసాల రికార్డింగ్లో కుడి ఎడమైతే అని ఆలపిస్తుండగా, ఆలస్యంగా రికార్డింగ్ థియేటర్కు చేరుకున్న సముద్రాల సీనియర్ ఈ మార్పును గమనించారు. పరిస్థితిని క్లిష్టతరం చేయదలుచుకోని ఆయన, దేవదాసు ఒక తాగుబోతు పాత్ర కాబట్టి, ఆయన ఎలా పాడితే ఏంటిలే అని మౌనంగా ఉండిపోయారు. ఈ అనుకోని అక్షర దోషమే పాటను ఊహించనంతగా ప్రజల్లోకి తీసుకెళ్లి, దానికి అద్భుతమైన ప్రజాదరణను తెచ్చిపెట్టింది. మద్రాసులో సైతం ఈ పాట మందుబాబుల నోట పడి ఎంతో ప్రసిద్ధి చెందిందని కనగాల జయకుమార్ గుర్తుచేసుకున్నారు.
ఈ పాట ప్రాచుర్యం పొందిన సమయంలో జరిగిన మరో సంఘటనను కూడా కనగాల జయకుమార్ వివరించారు. విజయవాడలో దేవదాసు విజయవంతంగా ఆడుతున్నప్పుడు, గొప్ప సినీ రచయిత ఆత్రేయ రిక్షాలో ప్రయాణిస్తున్నారు. అప్పుడు రిక్షావాడు కుడి ఎడమైతే పొరపాటు లేదే, ఓడిపోలేదోయ్ అని పాటను పాడుతుండగా, ఆత్రేయ అతడిని ప్రశ్నించారు. “కుడి కుడే అవుతుంది, ఎడమ ఎడమే అవుతుంది, కుడి ఎడమ ఎలా అవుతుందయ్యా? ఇందులో పొరపాటు లేకుండా ఎలా ఉంటుంది?” అని అడిగారు. ఆత్రేయ ఎవరు అని తెలియని ఆ రిక్షావాడు, “ఎవరండీ మీరు? అంత అద్భుతంగా ఘంటసాల పాడిన పాట, సముద్రాల రాశారండీ! పైగా తాగుబోతు కదా, ఎలా పాడితే ఏంటి?” అని సమాధానమిచ్చాడు. ఈ మాటలు ఆత్రేయని ఎంతగానో కదిలించాయని జయకుమార్ తెలియజేశారు.